У Гомельскай вобласці план прыёму ў каледжы сферы культуры і мастацтва выкананы на 100%

На калегіі галоўнага ўпраўлення ідэалагічнай работы, культуры і па справах моладзі аблвыканкама падвялі вынікі работы навучальных устаноў культуры і мастацтва Гомельскай вобласці ў мінулым навучальным годзе, намецілі задачы на наступны.

Педагогі павінны стаяць у авангардзе патрыятычнага выхавання. Важна прызнаваць іх грамадскую значнасць, аддаваць даніну павагі прафесіяналам сваёй справы, адзначыла начальнік аддзела мастацтва і аховы гісторыка-культурнай спадчыны галоўнага ўпраўлення ідэалагічнай работы, культуры і па справах моладзі аблвыканкама Алена Мармо.

У дзіцячых школах мастацтваў рэгіёна працуюць 1926 выкладчыкаў і канцэртмайстраў. Больш за палову маюць вышэйшую адукацыю. Сярод педагогаў каля 9% складаюць маладыя спецыялісты, 14,5% – людзі пенсійнага ўзросту.

Намінальная сярэдняя заработная плата ў першым паўгоддзі бягучага года склала 1300 рублёў. Па гэтым паказчыку ДШМ Гомельшчыны займаюць трэцяе месца ў краіне, каледжы – чацвёртае.

У нашым рэгіёне дзейнічаюць 59 дзіцячых школ мастацтваў, харэаграфічная і тры мастацкія школы. Пры гэтым не атрымалі развіцця новыя напрамкі дзейнасці ДШМ: камп'ютарная графіка, лічбавае музычнае мастацтва, фатаграфія.

Установы адукацыі бяруць усіх жадаючых, таму што кожнае дзіця павінна мець магчымасць развівацца ў культурна-эстэтычным асяроддзі, выказала ўпэўненасць Алена Мармо. У ДШМ вучацца звыш 300 дзяцей з абмежаванымі магчымасцямі. Праз некаторы час яны паказваюць добрыя вынікі – гэта доказ прафесіяналізму педагогаў. Пры гэтым больш за палову ад усіх навучэнцаў пакідаюць ДШМ без уважлівай прычыны.

На Гомельшчыне тры ўстановы сярэдняй спецыяльнай адукацыі ў сферы культуры: Мазырскі музычны каледж, Гомельскі мастацкі каледж і Гомельскі каледж мастацтваў імя Н. Ф. Сакалоўскага. У іх працуюць 246 выкладчыкаў. У мінулым годзе ва ўстановах навучаліся 744 чалавекі. Выпусціліся 178, дыпломы з адзнакай атрымалі 33 з іх.

План прыёму ў ССНУ сёлета выкананы на 100%. Конкурс склаў 1,6 чалавека на месца. Па асобных напрамках ён вышэйшы, у прыватнасці,на жывапіс –5,8, дызайн – 6,9 чалавека на месца.

На калегіі таксама абмеркавалі матэрыяльна-тэхнічнае забеспячэнне ўстаноў, творчыя поспехі навучэнцаў і педагогаў у розных конкурсах і ўручылі ўдзельнікам заслужаныя ўзнагароды.

Дырэктар Гомельскага каледжа мастацтваў імя Н. Ф. Сакалоўскага Таццяна Пузырэнка падкрэсліла, што задача педагогаў – заахвоціць моладзь фарміраваць уласную грамадзянскую пазіцыю, не проста даць веды, але і выхаваць патрыёта, які ўмее думаць і выказваць сваё меркаванне.

У калегіі прыняў удзел вядучы спецыяліст па акрэдытацыі ўстаноў сярэдняй спецыяльнай адукацыі Нацыянальнага агенцтва па забеспячэнні якасці адукацыі Уладзімір Чэрнікаў.

Начальнік галоўнага ўпраўлення ідэалагічнай работы, культуры і па справах моладзі аблвыканкама Дзяніс Язерскі пажадаў педагогам з баявым настроем пачаць работу ў новым навучальным годзе.