Форум стартуе 16 мая ў 17.00 каля драмтэатра за гадзіну да афіцыйнага адкрыцця. Міжнародны фестываль "Славянскія тэатральныя сустрэчы" праходзіць з 1989 года, і ў абласным цэнтры – у 15 раз.

– Гэта свайго роду юбілей, і мы хочам адсвяткаваць яго годна, – расказаў мастацкі кіраўнік Гомельскага аблдрамтэатра Сяргей Лагуценка. – Адкрые фестываль спектакль Беларускага дзяржаўнага маладзёжнага тэатра "Яшчэ раз пра каханне", і гэта сімвалічна, таму што тэатр – гэта і ёсць любоў. 

На гомельскай сцэне выступяць чатыры калектывы з Расіі – Разані, Смаленска, Бранска, Екацярынбурга. Рэпертуар разнастайны і падабраны так, каб цікава было ўсім, запэўніў мастацкі кіраўнік.

Пастаноўкі будуць праходзіць таксама на пляцоўках лялечнага і маладзёжнага тэатраў.

Ганаровы госць фестываля – Яна Паплаўская. У сераду, 17 мая, у Палацы Румянцавых і Паскевічаў яна правядзе творчую сустрэчу. Пачатак у 12.00.

– Усе, хто ў гэтыя дні прыйдзе у тэатр, атрымаюць асалоду ад такой неўміручай з'явы, як тэатр, – адзначыў Сяргей Лагуценка. – У гледачоў ёсць магчымасць пазнаёміцца з новымі тэатрамі і сябрамі.