Гомельскі абласны выканаўчы камітэт

Адрес облисполкома

Адрас: 246050, Гомель, пр. Леніна, 2
Галоўная | Эканомiка
Эканомiка

Новае нафтавае радовішча адкрылі ў Рэчыцкім раёне

08.04.2021
8 красавіка, Гомель /Кар. БЕЛТА/. У Беларусі адкрылі новае нафтавае радовішча. Гэта ўжо трэцяе адкрыццё з пачатку года, паведамілі БЕЛТА ў "Беларуснафце".

Спецыялісты кампаніі адкрылі Гур'янаўскае радовішча. Новы аб'ект знаходзіцца ў цэнтральнай зоне Прыпяцкага прагіну ў Рэчыцкім раёне.

Паводле папярэдняй ацэнкі, геалагічныя запасы Гур'янаўскага радовішча могуць скласці 600 тыс. т. Выпрабаванні нафтаперспектыўных пакладаў даюць падставы меркаваць, што тут будзе фантанны прыток нафты. Больш дакладны падлік запасаў вуглевадародаў і іх пастаноўка на дзяржбаланс спецыялісты выканаюць пасля будаўніцтва і асваення свідравіны, а таксама ўдакладненні геалагічнай будовы Гур'янаўскага радовішча.

"Вынікі свідравання і адкрыццё новых пакладаў павялічваюць перспектывы і рэсурсны патэнцыял Цэнтральнай структурнай зоны Прыпяцкага прагіну. У 2021-2022 гадах тут плануюць прабурыць 13 пошукава-разведачных свідравін", - расказалі на прадпрыемстве.

Гур'янаўскае радовішча - ужо трэцяе адкрыццё 2021 года. Да гэтага спецыялістамі "Беларуснафты" адкрыты Нова-Даманавіцкае і Усходне-Ізбыньскае радовішча. У 2021 годзе прырост запасаў вуглевадародаў ужо цалкам кампенсаваў гадавую здабычу нафты.

Вытворчае аб'яднанне "Беларуснафта" створана ў 1966 годзе. Прадпрыемства вядзе пошук, разведку і распрацоўку нафтавых радовішчаў, бурэнне свідравін, здабычу нафты і спадарожнага нафтавага газу ў Беларусі, працуе ў нафтавай сферы іншых краін.-0-

К СПИСКУ НОВОСТЕЙ